Премиерот Христијан Мицкоски на социјалните мрежи го најави укинувањето на институцијата економски директори во јавните здравствени установи. Тој посочи дека владата на денешната седница ќе ги разгледа измените на предлог законот за здравствена заштита.
„Со оваа мерка се стремиме кон подобрување на ефикасноста во управувањето со нашите здравствени установи, намалување на административните трошоци и насочување на средствата кон подобрување на здравствените услуги.
Новите законски одредби предвидуваат дека здравствените домови со над 1.000 вработени, универзитетските клинички центри, универзитетските клиники, клиничките болници и институтите ќе бидат раководени од само еден директор, кој ќе биде одговорен за организацијата и работењето на установата, како и за законитоста на работењето.
На овој начин ќе се лоцира и одговорноста и укине дуализмот во одлучувањето“ напиша Мицкоски
Тој посочи дека оваа реформа ќе овозможи пренасочување на средствата кон подобрување на здравствените услуги и инфраструктурата, зголемување на транспарентноста и отчетноста во работењето, како и подобрување на условите и квалитетот на здравствените услуги за сите граѓани.
