Лидерот на Движењето ЗНАМ, Максим Димитриевски, синоќа во емисијата Клик Плус, изјави дека според него, ова што им се прави на граѓаните на земјава со вадењето на личните документи, е срамота. И смета дека вадењето на новите документи требаше да биде финансиски покриено од државата.
„Првенствено целиот тој процес требаше да биде завршен и финансиски покриен од страна на државата, да не се изложуваат граѓаните на дополнителен трошок бидејќи тие не се виновни за тој договор што се случи. Одговорноста е на власта, на политичката елита која што владее. Срамно е да ги гледаме вака граѓаните каде стојат во коли и се туркаат за да добијат личен документ, а уште поголем срам е нефункционалноста на министерството за внатрешни работи да ја спроведе целата постапка. Истата не е изнудена од вчера, таа беше планирана подолг временски период. Треба да им се каже на граѓаните „Да, имате рок толку време, дополнително се пролонгира рокот и сето тоа ќе биде бесплатно бидејќи вие не сте виновни за тоа што морате да ги промените сопствените документи“, изјави тој.
Тој дополнително посочува и дека Преспанскиот договор не се почитува и исполнува од грчка страна, за кои вели дека немаат имплементирано ништо од нивните обврски по однос на договорот, а граѓаните го гледаат тоа.
„Договорот има две страни и двете страни имаат обврски. Од другата страна немаме мрднато ни милиметар. Оваа година сите ја посетивме Грција и сеуште не постои табла ниту со република Северна Македонија, туку пишува едно знакче Скопје. И таму централната власт ја префрла топката на регионалната или локална власт во делот на Солун, а локалната власт пак ја префрла топката на централната власт. И затоа според мене овој договор можеби можел да се уреди со дополнителни договори и анекси да се допрецизираат некои работи”, додава тој.
