Поради изразеното јужно воздушно струење кое ќе го има над нашиот дел од Европскиот Континент (Балканот, вклучувајќи ја и нашата Македонија) утре од Сахара кон нашите краишта ќе се врши голем транспорт на прашина и на песок, со што и Атмосферата ќе биде заматена, а дождот што го очекуваме ќе биде многу валкан, прогнозира Славчо Поповски.
Се работи за огромно количество на сахарска прашина и песок од Сахара, утре локално можно е да има дури вкупно и до 2000 честички на милиграм кубен (што е премногу), наведува тој во својата метео-анализа.
Под влијание на влажен воздушен бран од Медитеранот, од попладнево, во текот на ноќта кон петок и утре во земјава ќе има повремени врнежи од дожд, и истите локално ќе бидат пообилни (со што локално ќе наврнат до околу, па и над 20 литри дожд на метар квадратен), особено во западните и во јужните предели од државава.
Снег ќе врне само на највисоките планини во северозападните предели од Македонија (односно на највисоките места на планината Шар Планина).
Во Скопје и околината исто така со овој влажен бран очекуваме повремени врнежи од дожд.
Од денес до петок повремено ќе дува засилен ветер од југоисточен правец (повремено и локално со брзина од над 60 км/час).
Што се однесува до температурите, тие и понатаму остануваат невообичаено високи за овој период од годината, што значи дека тие речиси насекаде ќе надминуваат 10 степени, а во најтоплите централни и југоисточни предели температурите ќе се искачат дури до околу 20 степени.