Иако е само неколку минути оддалечена од центарот на градот, Козле е мирна населба. Секој ден е се посредено и поубаво. Голем дел од поранешните бараки (доделени по земјотресот) се реновираа во модерни куќи со убаво средени дворови.
- Нема застои во сообраќајот, иако за сигнализација има само едни семафори на улица "Козле". Единствената автобуска линија на ЈСП " Скопје" која сообраќа во овој правец е автобусот со број 57, а жителите велат дека во моментов таа ги задоволува нивните секојдневни потреби, иако може да биде и подобро.
- За едукација на учениците од прво до осмо одделение во населбава е Основното училиште "Владо Тасевски". За оние кои идната професија би им била од областа на угостителството, средното образование можат да го продолжат во средното угостителско училиште "Лазар Танев".
- Најмалите се згрижени во две детски градинки. Едната се наоѓа веднаш до основното училиште, а другата во непосредна близина на слаткарницата " Канела".
- Основните прехранбени продукти жителите ги набавуваат од малите дуќанчиња, кои се трудат да го понудат она што е најпотребно. За некои поголеми потреби, во непосредна близина на населбата е лоциран супермаркетот "Веро" и популарното пазарче во Тафталиџе.
- Она по што многумина ја запознале оваа населба или, пак, слушнале за неа (за оние што не се од Скопје) е Институтот за белодробни заболувања за деца "Козле". Услугите на оваа здравствена установа можат да ги користат сите граѓани на Македонија.
