Министерството за образование и наука (МОН) соопшти дека почнуваат реконструктивни зафати во основното училиште „Арсени Глоѓи“ во Теарце, изработка на термотехничка фасада во ОУ „Ѓерг Кастриоти Скендербегу“ во Арачиново, санација на потпорниот ѕид и реконструкција на училиштето „Јунус Емре“ во село Лисичани во Пласница, адаптација и реконструкција на училишна зграда во ООУ „Хајан Селмани“ во село Ростуше во општина Маврово и Ростуше и санација на покривот на училиштето „Песталоци“ во општина Центар.
- Планот е поширок и предвидува реконструкција на 118 училишни објекти во кои ќе се подобри пристапноста за учениците со попреченост, како и внатрешните услови. Министерството за образование и наука плански вложува во подобрување на условите за изведување на настава, затоа што тие влијаат на посветеноста на учениците и на мотивацијата на наставниците, соопшти МОН.
Во средното образование, пак, нов објект ќе добие кумановската гимназија „Сами Фрашери“. Предвидени се инвестиции за целосна реконструкција и на сите девет државни студентски домови, за осовременување на условите за престој и учење, како и зголемување на енергетската ефикасност.
- Оваа година ќе почне изградба и на 10 нови спортски објекти, во рамки на проектот за изградба на 145 училишни спортски сали. Почетокот на изградбата на новата зграда на Универзитетот „Мајка Тереза“ во Скопје и продолжувањето на градежните работи на објектите на ФИНКИ и на Факултетот за физичка култура во Скопје се трите големи проекти кои Министерството за образование и наука ќе ги реализира во 2023 година, во рамките на Програмата за капитални инвестиции, информираат од министерството.
