Во Градската општа болница „8 Септември“ обезбедени се дополнителни места на интензивна нега и дополнителни два респиратори за да може да ги прими зголемениот број пациенти, информира Министерството за здравство, пренесува СДК.
Во тек е реконструкција на Клиниката за дигестивна хирургија, која ќе трае наредните неколку недели и дел од пациентите се преупатуваат во „8 Септември“ и во хируршката клиника „Св. Наум Охридски“.
Од Министерството за здравство велат дека сите пациенти ќе бидат згрижени.
„Во моментов ‘8 Септември’ располага со шест респиратори во шок соба и два резервни респиратора, кои се користат. Заради големата фреквенција на пациенти обезбедени се услови за дополнителни места за интензивна нега со дополнителни два респиратора, кои ќе се користат во следниот период до завршување на реновирањето на клиниката за дигестивна хирургија“, велат од Министерство за здравство.
Минатата недела во „8 септември“ поради зголемен број пациенти и оптовареност на одделот за интензивна нега, дел од операциите кои не се итни и кои може да чекаат се одложуваа. Директорот на „8 Септември“ д-р Кристијан Костов рече дека ова одложување не е со месеци, туку за неколку недели, бидејќи и покрај тоа што операциите не се итни не може пациентите да чекаат во недоглед. Тој рече дека бројот на пациенти им е зголемен за 20 отсто, откако почнало реновирање на Абдоменална хирургија.
