Домаќинките секоја година се во дилема кога е во прашање спремањето околу Велигден. Покрај тоа што за тој ден има голем избор на јадења, домаќинките речиси и да се натпреваруваат која ќе има подобро украсена трпеза и поубаво исфарбани јајца.

Секој совет им е добредојден на домаќинките, особено оние помладите, а повозрасните се секогаш тука да кажат нешто плус од нивното претходно искуство.

За да не ви се случи за Велигден да останете со мноштво испукани јајца што ќе бидат неупотребливи за бојадисување, еве што треба да избегнувате.

 Иако нема некоја голема филозофија во подготвувањето варени јајца, сепак овие грешки во подготвувањето на јајцата може да го расипат општиот впечаток.

Користите погрешно тенџере

 Во никој случај немојте да се обидувате да сварите повеќе јајца во мало тенџере. Освен тоа што некои јајца нема добро да се сварат, друг дел ќе испукаат поради притисокот.

 Немојте да ставате неварени јајца во вода што врие

 Ако мислите дека на тој начин ќе го скратите процесот на варее, тогаш се лажете. Правило број еден е јајцата да ги варите во студена вода. На тој начин температурата подеднакво ќе расте, јајцата ќе се сварат рамномерно и нема да испукаат.

 Немојте да варите свежи јајца

 Тврдо сварените јајца може да бидат незгодни за лупење. Колку јајцата се постари, толку полесно ќе можете да ја извадите лушпата од нив.

 Преварени јајца

 Ова може секому да му се случи, но доколку не сакате да добиете јајце што изгледа како да не може да се јаде, тогаш никако немојте да го варите подолго од 10 минути.

 По варењето измијте ги јајцата во студена вода

 Кај јајцата, но и кај други производи процесот на варење не престанува оној миг кога ќе го тргнете тенџерето од шпоретот. Доколку не сакате да ги преварите јајцата, тогаш измијте ги во студена вода веднаш по варењето.