Пратеничката и кандидатка за лидер на СДСМ, Славјанка Петровска денеска во емисијата „Daily Click“ на ТВ21 истакна дека во 2021 година, по локалните избори, се сметало дека со оставката на тогашниот претседател на СДСМ и премиер, Зоран Заев проблемите во СДСМ ќе бидат надминати, но сепак се донело погрешна одлука.
Можеби една од грешките во 2021 година, и тогаш имавме лош резултат на локалните избори, се сметаше дека само со оставката или повлекувањето на Зоран Заев од тогашен претседател и премиер во владата, дека проблемот ќе биде надминат, но очигледно е донесена погрешна проценка или одлука, или можеби недоволната анализа на резултатите тогаш доведоа до одредени процеси и затоа денес 2024 резултатите се катастрофални за СДСМ“, вели Петровска.
Таа додава дека не сака тоа да му се случува на СДСМ.
Во однос на тоа, поради што се одлучила да се кандидира за лидер на партијата, таа вели дека сега е времето.
„Мотивацијата за тоа да се кандидирам за претседател на СДСМ, освен стажот, пред се го црпам од тоа дека сега е времето, особено и заради овој лош резултат меѓутоа и заради сите општествени околности, но и сум подготвена да преземам одговорност да бидам предводник на реформите и предводник на промените кои неминовно мора да се случат“, порача Петровска.
Таа вели дека во нејзините 24 години во партијата, била дел од многу порази но и победи.
„Дефинитивно ова е историски еден од најголемите порази со кој СДСМ се соочил. Јасна е улогата на опозицијата, особено секогаш кога СДСМ е опозиција дава се од себе за да биде конструктивна опозиција и тогаш кога е потребно се разбира да придонесе за одредени државни прашања, секогаш учествува позитивно меѓутоа и да биде критичар на власта“, вели Петровска.
Според неа, можеби за почеток бројот 18 или толкавиот број на мандати може да делува демотивирачки, но не смее да ги обесхрабри.
