На неодамнешните награди доделени од специјализираниот интернет-портал за пребарување работни места Вработување.ком „Макпетрол“ беше прогласен за најпосакуваниот работодавач меѓу нафтените претпријатија во земјава, а со неодамнешната одлука компанијата и во пракса повторно го потврди ова признание.
Имено, дел од годинашната висока добивка од 21 милион евра лидерот на пазарот со нафтени деривати ќе распредели на вработените. За оваа намена се предвидени 110 милиони денари, односно 1,79 милиони евра.
Годишниот извештај на „Макпетрол“, кој е објавен на Македонската берза, покажува дека компанијата ја заврши минатата година со добивка од 1.290.959.428 денари, односно околу 21 милион евра. Тоа е одличен финансиски резултат во период на големи осцилации на цените на нафтата и природниот гас на светските берзи и недостигот од енергенси со кој светот се соочува во последните години.
Според извештајот, делови од оваа добивка ќе завршат во рацете на акционерите, на вработените, како и за нови инвестиции на компанијата во развојни проекти. Така, за исплата на дивиденда за акционерите се предвидени околу 334 милиони денари, односно околу 5,42 милиони евра, а за нови инвестиции се испланирани околу 300 милиони денари (околу 4,88 милиони евра).
Годинешната сума од распределенaта добивка за вработените ќе биде значително повисока од исплатената во минатата година, кога по овој основ „Макпетрол“ распредели вкупно 70 милиони денари по годишната сметка за 2021 година. Ова е дополнителен финансиски поттик за вработените во „Макпетрол“, кои минатата година и покрај кризата, двапати добија покачување на платите, со што нивните месечни приходи пораснаа за 20%.
Покрај зголемувањето на платите, компанијата лани на секој вработен исплати и регрес за годишен одмор во нето-износ од 33.000 денари, како и дополнителен новогодишен бонус од 30.000 денари.
Имајќи ги предвид последователните финансиски успеси во изминатите години, може да се очекува дека и оваа година „Макпетрол“ ќе продолжи со исто темпо на реализација на зацртаните проекти, остварување добивки и нудење дополнителни бенефиции за вработените.
Позитивните финансиски резултати кои компанијата ги оствари во минатата година се стабилна основа за натамошни капитални инвестиции на „Макпетрол“ кои ќе бидат позитивен импулс за домашната економија.
