Министерката за одбрана, Славјанка Петровска, во воздухопловниот ВИНГ оствари средба со извршниот директор на Воздухопловно-ремонтниот завод „ЛОМ-Прага“, Јири Протива, и со амбасадорот на Чешката Република, Јарослав Лудва.
„По многу години, имаме партнер за соработка, кој ги гарантира оперативноста и одржувањето на нашите авиони. Ние сакаме опрема која ќе биде оперативна и токму благодарение на двата договора влада со влада – за ремонт, за набавка на резервни делови и за обука на персонал за одржување на авионите – сега имаме партнер на кој можеме да се потпреме“, истакна министерката Петровска.
Таа ја потенцира важноста од исполнувањето на договорот, што ќе значи и подигнување на капацитетите на воздухопловниот ВИНГ.
„Навремената испорака на двата хеликоптера е добар знак и ги потврдува добрата соработка и позитивни релации меѓу нашите две земји. Реализацијата на овој договор претставува позитивен пример за продолжување на нашата добра одбранбена соработка“, рече Петровска.
Извршниот директор на „ЛОМ-Прага“, Јири Протива, најнапред упати благодарност за денешната средба и потенцира дека двата договора се исполнуваат во целост. Тој додаде дека испораката ќе биде навремена и во следните фази во согласност со договорите е и обука на персонал за одржување на авионите.
Амбасадорт Лудва на средбата потенцира дека двете страни од самиот почеток работеа напорно за да се реализира овој проект со цел да се стигне до финалната фаза.
На денешната средба во воздухопловниот ВИНГ присуствуваа и државниот секретар во Министерството за одбрана, Владимир Анчев, конзулот на Чешката Република, Давид Чернохорски, командантот на воздухопловниот ВИНГ, полковник Игорчо Стоименовски, и претставници од Министерството за одбрана и воздухопловниот ВИНГ.
Двата договора потпишани влада со влада придонесуваат за системски да се решат предизвиците и овозможуваат брза и навремена испорака на резервни делови потребни за целосна функционалност на авионите на македонската Армија. Испораката на двата ремонтирани хеликоптера ќе се реализира во првата половина на 2024 година.
