Студентите во студентскиот дом „Стив Наумов“ немаат парно поради дефект на внатрешната инсталација кој е во надлежност на управата на домот, соопштиј од компанијата БЕГ.
„Екипите на БЕГ пред почетокот на грејната сезона навреме извршија проверка на топлинската станица на Студенскиот дом ‘Стив Наумов’, при што беше констатирано дека истата е технички исправна за преземање на топлинска енергија од централниот систем за греење. Во моментов студетскиот дом нема централно греење поради дефект во внатрешната инсталација, чие одржување согласно важечката регулатива е обврска на управата на домот“, се вели во соопштението.
Од БЕГ додаваат дека сè додека управата не го среди овој проблем во внатрешната инсталација, компанијата не е во можност да испорача топлинска енергија.
„Студентскиот дом ‘Стив Наумов’ е во групата објекти кои не ја подготвија внатрешната инсталација согласно обврските за почеток на грејната сезона, за што навреме ја информиравме јавноста. Со оглед на фактот дека се работи за студентски дом каде се сместени голем број студенти, БЕГ како општествено одговорна компанија е секогаш подготвена со своите стручни екипи да даде поддршка на управата на домот за надминување на овој проблем“, велат од компанијата.
