Велигденски базар на кој ќе може да се видат креативни занаетчиски производи од членови на Занаетчиската комора денеска ќе се одржи пред трговскиот центар „Капитол“ во организација на Општина Аеродром, ТЦ „Капитол“ и Занаетчиската комора на Скопје.
На базарот ќе може да се видат и изработки од членовите на невладините организации за лица со посебни потреби на територијата на Општината, меѓу кои Солем, Порака, Мобилност и Доблест.
Целта на велигденскиот базар е да се промовираат традиционалните вредности преку промоција на занаетчиски изработки како филигран, производи од дрво, плетиво, текстил, накит, разни украси, изработки од стакло и други рачни изработки.
Во рамки на базарот, кој ќе биде отворен секој ден од 10 до 20 часот, ќе се одржуваат и културно забавни активности на професионални аниматори, мини-концерти на етно-бендови и други познати пејачи, како и промоција на техники за изработка на велигденски украси.
