Женското монашко сестринство во манастирот „Успение на Пресвета Богородица“, манастирски комплекс лоциран во непосредна близина на прекрасниот кањон Матка.
Црквата е ѕидана од камен и тула, во форма на стеснет впишан крст, со слепи странични бродови и една осумаголна купола. На куполата има 4 прозорци ориентирани кон четирите страни на светот и се потпира на 4 пиластри, а олтарната апсида однадвор е тристрана.
Во самата црковна градба биле вѕидани следните камени елементи од ранохристијански храм (рамковно 6.в.н.е): два двојни прозорски столба од мермер високо во куполниот тамбур; потполно сочуван столб од травертин, всидан во јужниот ѕид; два дела од еден олтарен столбец; дел од олтарен столбец; мал олтарен четирилистен капител вѕидан во северната фасада.