Лидерите на СДСМ и на ВМРО-ДПМНЕ, Димитар Ковачевски и Христијан Мицкоски, вечерва се соочија на дуел на Канал 5 ТВ, во пресрет на утрешниот почеток на изборната кампања за претседателските избори, кои треба да се одржат на 24 април (прв круг) и 8 мај (втор круг), заедно со парламентарните избори.
Ова е прво телевизиско соочување на двајцата претенденти за премиер откако Ковачевски стана лидер на СДСМ.
„СДСМ долго време бараше, бараше и конечно најде човек кој што е подготвен да изгуби. И нема подобар пример од Стево Пендаровски како човек кој што е подготвен да изгуби и да доживее дебакл на следните претседателски избори“, истакна претседателот на ВМРО-ДПМНЕ, Христијан Мицкоски во „Дуел за Македонија“ на „Само вистина“ на Канал 5 телевизија.
„Тоа ќе стане јасно уште на 24-ти април, нема потреба да чекаме до осми мај“, заклучи Мицкоски.
Мицкоски смета дека Стево Пендаровски како претседател не покажа ама баш ништо со што ја заслужи титулата да биде пак претседател.
„Тој е склон да озборува, нешто што не би требало да прави еден претседател. И најчесто тоа покрај тоа што го прави со политичките противници, го прави и со највисокото раководство на партијата која што го предложила да биде претседател. И мислам дека Македонија тоа што го изгуби изминативе пет години додека Стево Пендаровски беше претседател ќе го надокнадиме многу брзо во следните пет години кога Гордана Силјановска Давкова ќе биде претседател на Македонија“, заклучи претседателот на ВМРО-ДПМНЕ.
Тој посочи дека Пендаровски не поседува било каква претседателска карактеристика која што треба да биде одлучувачка за граѓаните да му го дадат својот глас.
