Алцхајмеровата болест е четвртата водечка причина за смртност во светот поради која годишно умираат повеќе луѓе отколку од карцином на дојка и простата заедно. Просечното преживување е околу 8 до 10 години, тешки години, како за болниот, така и за неговите најблиски.
Постои мит дека таа е тешка, но не е смртоносна како некои други болести. Алцхајмеровата болест е мошне тажна болест. Не дека има болест која не е тажна, но таа е единствената што полека го краде буквално сето тоа што сте го научиле во животот, сите ваши спомени, сеќавања од убави и помалку убави настани, сите вештини што макотрпно сте ги стекнале низ животот, за на крај да ви ги одземе и вашите деца, сопружници.
Во напредниот стадиум на болеста, потребна е 24-часовна грижа, а негувателите, најчесто сопружниците и децата, се растргнати меѓу грижата за саканиот и секојдневните работни и семени обврски.
Кај нас, семејствата се оставени сами на себе да се справуваат со болеста, без да имаат финансска поддршка или поддршка од различни сервиси, дневни центри и домашни посети од стручни лица. Со дијагностицирање на болеста во раниот стадиум и навремено почнување со третман, можеме да влијаеме на подобрување на квалитетот на живот и подолго одржување на самостојноста. Заборавањето не е дел од нормалното стареење.
Главни симптови на Алцхајмеровата болест е заборавање на скорешни настани, дезориентација во простор и време, проблеми во комункација, промена во расположение и промена во дневната рутина.
Според статистичките податоци во Македонија има на 400.000 лица со над 65 години од кои се проценува дека околу 20 илјади имаат Алцхајмерова болест, а се третираат само 2.000 до 3.000 од нив. Тоа, според ресорниот министер е многу мала бројка. Во државите во соседството како Србија, Хрватска се третираат 40 до 50 проценти.
Податоците на надлежните институции покажуваат дека во светот на секои три секунди има еден нов заболен од Алцхајмер и оти бројот на заболени се удвојува на секои 20 години. Смртноста од оваа болест е поголема од предизвиканата од карцином на дојка и простата заедно. Податоците покажуваат и дека 40 проценти од негувателите на лица со Алцхајмерова болест страдаат од депресија.