Во близина на Анкара, секојдневно може да се види необичен караван што им измамува насмевка на минувачите.
Наместо патници, во шарени вагони направени од пластични буриња се возат кучиња со инвалидитет, кои поради тешки повреди или парализа никогаш не би можеле сами да трчаат низ природата.
Зад оваа инспиративна приказна стои Букет Озгунлу, која целиот свој живот го посветила на спасување напуштени и повредени кучиња. Во нејзиното засолниште живеат околу 560 спасени животни, од кои повеќе од 300 имаат трајни физички попречености. Освен што им обезбедува медицинска нега, колички за движење и безбеден дом, таа сакала да им овозможи и нешто што не може да се купи – чувство на слобода. Така ја создала идејата за „возот за кучиња“ – шарени вагони прикачени на мало возило, со кои секојдневно ги носи на прошетки низ околината.
За многу од овие кучиња, тоа е единствената можност да почувствуваат ветер, нови мириси и радоста од движењето надвор од засолништето. Мештаните веќе го препознаваат необичниот караван и често излегуваат да ги поздрават неговите патници.
Инспирацијата за оваа идеја дошла од личното искуство на Букет, која сфатила колку излегувањето надвор и промената на средината можат да значат за некого што има ограничена подвижност. Истата грижа и внимание решила да им ги подари и на животните што зависат од човечка помош.
Нејзината приказна е потсетник дека сочувството не се мери со големи зборови, туку со мали дела што секому можат да му донесат достоинство, радост и подобар живот.
