Зелениот пазар и Пластичарската улица на мета на комуналните инспектори

Итни реформи на градскиот Инспекторат за поголема ефикасност, негова транспарентност и достапност до граѓаните за да биде вистинска алатка преку која граѓаните ќе можат да ги остварат своите права, се само дел од суштинските предизвици што пред себе си ги поставува новиот раководител на Секторот инспекторат на Град Скопје, Мирослав Богдановски.

Како што информираат од Град Скопје, на оваа позиција Богдановски доаѓа од Агенцијата за просторно планирање, каде што работел 10 години, а една година бил и директор на Државниот инспекторат за животна средина.

Според него, потребно е да се направи извесна реформа на Инспекторатот, да се зголеми бројот на инспектори, а, како што вели, има потреба да се формира и еколошка или комунална полиција со зголемени надлежности.

– За да се отстранат пречките во работењето со кои се соочува овој Инспекторат, веќе поднесовме иницијативи за промена на одредени закони од областа на патниот сообраќај и од комуналната сфера – вели Богдановски.

Тој нагласува дека Инспекторатот во изминатиов период спровел и конкретни акции за расчистување на јавните површини.

– Во текот на изминативе денови спроведовме акции за расчистување на јавните површини од препродавачите на сезонско овошје и зеленчук. Долгогодишниот проблем, на пример, што постоеше со препродавачите на улицата “Брадфордска” го решивме, а ги расчистуваме јавните површини и на Бит-пазар и на булеварот “Трета македонска бригадa”. Ваквите акции ќе бидат се почести за да се воведе ред на јавните површини. Во наредниот период ќе се посветиме на делот кај Зелениот пазар, како и на булеварот “Никола Карев” (Пластичарската улица). Нелегалните препродавачи деновиве постојано ги опоменуваме за да ги отстранат производите од јавните површини, но потоа, доколку тоа не донесе резултат, тогаш ќе преземеме законски мерки. За успешно и ефикасно извршување на работата на инспекторите и на комуналните редари, кои работат во смени, ќе се организира и нивна соодветна едукација – информира Богдановски.

За да се реши долгогодишниот проблем со препродавачите на сезонска стока, на јавните површини, градскиот Инспекторат во соработка со Секторот за планирање и уредување на просторот, бараат решение со кое на продавачите ќе им се овозможи легално да ја продаваат својата сезонска стока.