МТФ „Скупи фестивал 2015“ вечер ќе заврши со гостување на две камерни претстави од Бугарија и од Грузија.
Од 20 часот во кино „Фросина“ ќе биде изведена „Куќата на гневот“ на Театар Взраждане од Софија во режија на Диана Добрева. Во претставата осум жени бараат одговори за слободата на човековата волја и за патот кон среќата. Основа за драматургијата на оваа претстава е „Куќата на Бернарда Алба“, стихови на Федерико Гарсија Лорка, како и поеми на Рафаел Алберти, Мигел Ернандес и Диана Добрева.
Од 22 часот во Дансинг салата во МКЦ ќе гостува Нодар Думбадзе Професионал државен младински театар од Тбилиси со претставата „1945“. Автор и режисер е Николоз Сабашвили.
Претставата го опишува животот на едно германско момче и неговиот пат од детството кон зрелоста. Погрешното однесување на родителите, непријателството на луѓето, насилството и недостижната љубов влијаат на неговата психофизичка состојба, така што момчето од личност се претвора во диктатор.
По петдневно траење на „Скупи фестивал“, тричлено жири вечер ќе го прогласи победникот на годинашното издание.
