Македонија ја стекна независноста во исклучително сложени политички и безбедносни околности, во време кога Југославија веќе се распаѓаше, а во делови од поранешната федерација започнуваа вооружени конфликти.
За ризиците со кои се соочувала земјата во тој период говореше Трајан Гоцевски, првиот министер за одбрана на независна Македонија, во „Отвореното студио“ на 4ТВ.
Гоцевски, кој ја предводеше новоформираната институција за одбрана во првите години од независноста, се осврна на условите во кои Македонија го реализираше процесот на осамостојување и на безбедносните предизвици со кои се соочувало тогашното државно раководство.
Според него, Македонија била последната од југословенските републики што тргнала по патот на независноста, а процесот се одвивал под силни политички и безбедносни притисоци.
„Беа подготвени за четири до шест часа Македонија да ја стават под воена управа“, изјави Гоцевски.
Тој посочи дека тогашното сојузно претседателство на Југославија ја овластило Југословенската народна армија да интервенира во републиките во кои ќе бидат препознаени сепаратистички активности.
Опасноста, според него, била особено сериозна затоа што Македонија во тој момент немала сопствена армија. Од другата страна стоела ЈНА – значително поголема и подобро вооружена воена сила, со воена инфраструктура и единици распоредени на територијата на републиката.
Во такви услови, едно од клучните прашања за новото македонско државно раководство било како да се спроведе осамостојувањето без земјата да биде вовлечена во вооружените конфликти што веќе го зафаќале регионот.
Гоцевски нагласи дека историското значење на независноста е огромно, бидејќи македонскиот народ за првпат добил своја суверена и независна држава.
Неговото сведоштво потсетува на безбедносната неизвесност во која се наоѓала Македонија во клучниот период од распаѓањето на Југославија – држава која тргнала по сопствен пат без сопствена армија, во услови на распад на федерацијата и присуство на моќна југословенска воена структура.
