Поранешната фабрика „4ти јули“, односно два објекти од нејзиниот комплекс ќе бидат урнати, за да се прошири улицата „Борис Сарафов“ во скопската населба Ѓорче Петров.
По долги преговори постигнат е договор со сопствениците не земјиштето и објектите, за да се урнат објектите кои се наоѓаат на предвидената траса на улицата која во моментов се реконструира. Улицата „Борис Сарафов“ претставува проект за комплетирање на сообраќајните решенија во овој дел од градот и поврзување со кружниот тек кај црквата „Св. Петар и Павле“.
Со проширувањето на конкретната локација, во должина од 50 метри улицата ќе добие 4 коловозни ленти.
Со ова проширување, ќе се подобри безбедноста на сообраќајот како и протокот на возила, бидејќи ова место со години претставува тесно сообраќајно грло. Целта е да се растерети сообраќајот кој во моментов оди преку главната улица во населбата, улицата „Ѓорче Петров“.
По 30 години, конечно овој дел од Ѓорче, ќе го добие замислениот изглед и функционалност. За оваа цел Град Скопје и Општина Ѓорче Петров издвоија речиси 6 милиони денари.