Волците почнаа да „мигрираат“ во населените места барајќи храна. По првиот ден од Божиќ во скопското село Ракотинци биле задавени петнаесетина овци, преживеале само две, а помеѓу жителите се „населил“ и стравот, па, како што велат, по драматичната вечер, ретко кој излегува надвор во вечерните часови.
Дека стадо овци биле нападнати од штетен дивеч потврдуваат и од скопската полиција, во чиј записник стои дека настанот се случил помеѓу 20 и 8 часот, ноќта од седми кон осми јануари. Случајот го пријавил сопственикот на овците, кои биле нападнати во трлото што се наоѓа во неговиот двор, пишува Нова Македонија.
- Не знаеме за колку волци станува збор, претпоставуваме дека биле во поголем број бидејќи настрадаа петнаесетина овци на соседот. Мислам дека доаѓале повеќепати, бидејќи една вечер пред овој настан и јас самата во дворот забележав траги од шепи на животни кои беа поголеми од оние што ги има кучето. Сите сме исплашени и повнимателни, оттогаш јас не ни излегувам сама кога ќе се стемни - раскажува 30-годишна жителка на Ракотинци.
Скопско Ракотинци не е единственото место каде што владее ваков страв од волци, кои изминатиов период биле забележани и во населените места во подножјата на Осоговските и Малешевските Планини.
