Во новиот ресторан „Umbrella“ вработени 10 лица со попреченост

Во Градскиот трговски центар синоќа беше отворен ресторанот „Umbrella“, каде се вработени десет лица со попреченост.

Министерката за труд и социјална политика Мила Царовска истакна дека планот за работењето на ресторанот, каде ќе има и вработени лица со попреченост, е единствената идеја што навистина ќе даде придонес кон она кое Владата постојано го зборува, а тоа е дека сите граѓани во Република Македонија треба да ги гледаме како потенцијал.

– Можеби онаа деинституализација што ја зборувавме на почетокот, што ја пишувавме во програми, звучеше тешко, неважна за нашето опшество, но во суштина е многу важна, нагласи Царовска.

Посочи дека со тоа правиме лицата со попреченост од изолираните институции да бидат донесени во заедницата, да работат, и како што потенцираше, заедно да се смееме и заедно да споделуваме.

– Колку повеќе научиме да сакаме и да ги прифаќаме различните, толку подобро општество ќе имаме, толку подобра Македонија ќе имаме, порача Царовска.

Градоначалникот на Општина Карпош Стефан Богоев посочи дека со задоволство ја прифатил идејата.
– Сите сме исти, сите сме еднакви и сите имаме и можност и сите мора да ја имаме таа можност да можеме да заработиме и да можеме сами, со поддршка на сите околу нас, да си обезбедиме нормален приход и нормален и пристоен живот во нашата земја, истакна Богоев.

Професорката Софија Георгиевска изрази задоволство што била дел од проектот, односно дел од обуките кои ги имале лицата со попреченост.

– Идејата потекнува од сопственикот на локалот. Станува збор за идеја што е многу благородна. Идејата е да се вработат лица со попреченост, меѓутоа ова да биде место што ќе биде препознатливо по добра услуга и по многу насмевки, наведе Георгиевска.

Информираше дека проектот во најголема мера е финансиски поддржан со средства на сопственикот на локалот, посочувајќи дека се добиени донации и од осум компании.

Проектот ужива поддршка од Министерството за труд и социјална политика, Општина Карпош и Агенцијата за вработување, додека Филозовскиот се јавува како партнер од аспект на кадар и поддршка со студенти.