Во Јурумлери ќе се гради фекална канализација

Општина Гази Баба потпиша договор за изградба на вакуумска фекална канализација во скопската населба Јурумлери.

Ова населено место е едно од десетината населби од периферијата на Скопје во кои досега не била изградена канализациона мрежа.

За изведба на фекалната канализација се издвоени финансиски средства од 18.780.616 денари од општинскиот буџет на Гази Баба. Рокот за завршување на зафатот е 12 месеци.

Изградбата на канализациона мрежа во населбата Јурумлери е дел од проектот за решавање на проблемот со отпадните води во три населени места од источните делови на Скопје. Заедно со Јурумлери, во проектот се вклучени и населбите Гоце Делчев и Трубарево со вкупна бројка на население од 12.000 жители. Кон крајот на септември беше распишан и тендерот за изведба на фекална канализација во населбата Гоце Делчев. Инфраструктурниот зафат за овие три населби се најавуваше четири години наназад од претходната власт, а тогашната вредност на проектот се проценуваше на 50 милиони денари.