Во болницата „Филип втори“ почна да работи лабораторија за генетски испитувања

Лабораторија за генетика и персонализирана медицина е промовирана денеска во Специјалната болница за кардиоваскуларни болести „Филип Втори“.

Станува збор за нови молекуларни и генетски тестови со кои ќе може да се откријат предиспозиции за развивање срцеви болести, предиспозиции кон коагулопатии кај бремени жени при хормонска терапија и ин витро оплодување, дебелеење и препорака за начин на исхрана, реакција и несакани дејства на лекови (фарматогенетика).

Покрај тоа, ќе се прават тестови за персонализирана терапија на рак и наследност на рак, секвенционирање на цел геном и цел егзом, ќе се откриваат генетиски болести кај плод после после 10-тата недела од бременост со неинвазивни методи (земање крв од мајката) и молекуварна детекција на инфективни болести.

- Огромен е исчекорот во дијагностиката на канцер, каде на база на генетските испитувања може однапред да се знае на какви предиспозиции пациентот е склон. Може да се одреди генетската предиспозиција дали организмот на човекот е погоден за спортот кој го избрал и да добие препорака за каков вид спорт е прилагодена неговата мускулатура. Лабораторијата е достапна не само за болни туку и за здрави луѓе, истакна денеска на прес-конференцијата доктор Жан Митрев, основачот, сопственик и директор на болницата.

Одговарајќи на новинарско прашање рече дека едно испитување може да чини 1.500 и 2.000 евра и зависи од пакетот односно колку е опсежноста на испитувањето.

Иван Конгуловски од Биоинжинеринг Доо, рече дека првичниот основен пакет чини 9.900 денари. 

- Имаме шест мутации на гени поврзани со дебелина и начин на исхрана и тип 2 дијабетес и тоа чини 12.000 денари. Едно од наинтересните испитувања кои планираме да ги правиме е персонализираната генетика, што е всушност основата на персонализираната медицина. Нашиот тим ќе бидат прв во Република Македонија кој ќе го секвенционираат целиот геном.