Од владејачката партија ВМРО-ДПМНЕ денеска изнесоа сериозни обвинувања на адреса на поранешниот премиер Зоран Заев и поранешниот министер за здравство Венко Филипче, тврдејќи дека двајцата, додека биле на власт, се обиделе да ја преземат приватната болница „Жан Митрев“ преку закани, уцени и злоупотреба на државните институции.
Според соопштението на партијата, обвинувањата се темелат на сведоштва на докторот и сопственик на клиниката, Жан Митрев, изнесени во интервју на национална телевизија. ВМРО-ДПМНЕ наведува дека во период кога се водел судски процес, а институциите биле под контрола на тогашната власт, биле блокирани сметките на болницата и личната сметка на д-р Митрев, како и воведена забрана за продажба на клиниката.
„Шокантен е фактот дека, според сведочењето на Жан Митрев, само една недела откако поединци од власта изразиле интерес за болницата, Јавното обвинителство ја укинало забраната за продажба“, се наведува во соопштението. Од ВМРО-ДПМНЕ ваквото постапување го оценуваат како доказ за политички притисок и директно мешање во правосудството.
Партијата дополнително тврди дека целта била болницата да се откупи по цена значително пониска од нејзината реална пазарна вредност, што го квалификува како организиран грабеж под маската на институционално постапување. Во соопштението се наведува и дека, во време на КОВИД-пандемијата, додека граѓаните се соочувале со сериозни последици, поранешните функционери наводно се обидувале да профитираат преку преземање на приватни здравствени установи.
Од ВМРО-ДПМНЕ апелираат до Јавното обвинителство итно да отвори постапка за сите изнесени наводи и да постапува неселективно, потенцирајќи дека, како што велат, „законот мора да важи за сите, без исклучок“.
