Матурската прослава на деветоодделенците од основното училиште „Владо Милиќ“ во Долна Горица денеска тргна наопаку кога децата ја запалија училишната зграда додека палеле факел. Во пожарот, за среќа, нема повредени.
Директорката на училиштето „Владо Милиќ“, Ивана Милиќ, за црногорските медиуми изјави дека, освен големата штета, која допрва треба да се утврдува, во пожарот во училиштето нема повредени.
„Штетата допрва ќе се утврдува“, кусо коментира Милиќ за „Вјести“.
Таа за новинарите пред училиштето изјави дека инцидентот се случил околу 10 часот.
„Во палењето на факелот учествуваа сите ученици од деветто одделение“, рече Милиќ коментирајќи ги причините за избувнувањето на пожарот.
Како што може да се види на неколку видеа што кружат на социјалните мрежи, децата панично бегале што подалеку од училиштето додека пламените јазици го зафатиле покривот на образовната институција. Според видеото, најисплашени биле учениците од пониските одделенија, кои при евакуацијата со неверување гледале во чадот што се протегал на неколку метри до небото.
Вршителот на должноста командант на Службата за заштита и спасување на Подгорица, Здравко Блечиќ, за новинарите изјави дека на местото на настанот излегле пет екипи со 15 пожарникари.
„Огнот зафатил дел од покривот и површина од 40 до 50 квадратни метри. Пожарникарите имаа проблеми со приближувањето и пристапот до овој дел од училиштето, но со помош на чуварот, кој беше многу брз, успеаја“, рече Блечиќ.
Тој рече дека штетите во училиштето се големи.
„Влагата и употребената вода може да предизвикаат штети и во училниците.“, рече Блечиќ.
