Синоќа започна четиринаесеттото издание на фестивалот Пиволенд - фестивалот кој е еден од белезите на градот. Годинава забавата е во Паркот на франкофонијата.
На манифестацијата ќе можете да дегустирате повеќе од 120 видови пиво. Ќе има над 30 брендови на домашни, странски и занаетчиски пива. Покрај пивото, ќе има и македонска храна и деликатеси. Ќе бидат присутни и неколку познати производители на улична храна.
Музичката програма ќе трае од 18:00 до 02:00 часот секој ден.
Вечерва, на програмата се еден млад бенд, Вера Јанковиќ, метал бендот Мамут, Паркети, Куку Леле и Диџеј Александар Јордановски.
Утревечер, на 23 август, ќе настапат Контра План, српските панк-рок легенди СИКС ПАК, Дани Димитровска, Пауза за ракија и Диџеј Димитри од Чаир.
- Пиволенд нуди разновидна музичка и пивска програма во текот на три дена. Треба да го проверите распоредот за да ја испланирате вашата посета. Настанот е клучен дел од летниот културен живот на Скопје, велат организаторите.
