Утре голем концерт посветен на Тоше - еве кои музички ѕвезди ќе пеат

Концертот посветен на Тоше Проески  ќе се одржи утре во ВИП Арената „Борис Трајковски“.

На концертот ќе биде промовиран и албум со нови, до сега необјавени песни од Тоше Проески. Албумот е со наслов “Secret place” и на него се наоѓаат седум нови песни на англиски јазик како и три преработки на познати хитови.

Тој е и автор на дел од песните, а неколку песни се заедничко дело на Тоше и познатиот англиски композитор и продуцент Енди Рајт. На концертот премиерно ќе бидат прикажани два нови видео спота со  песните од Тоше.

Борис Новковиќ, Владо Калембер, Каролина Гочева, Александра Радовиќ, Бојан Маровиќ, Тијана Дапчевиќ, Ања Рупел, Тамара Тодевска, Даниел Кајмакоски, групата „Фрајле“, Наум Петрески, бугарската пејачка Клавдија, Борис Режак, Антонија Гиговска, Александар Тарабунов, Александра Јанева... се дел од ѕвездите кои ќе настапат на концертот и со кои публиката ќе ги пее најголемите хитови на Тоше, како и песните од мјузиклот „Тајно моја“, додека неговиот внук Кристијан Ристески ќе ја изведе „We are blood“, песната која се наоѓа на новиот албум.