Градоначалникот на Град Скопје, Коце Трајановски, вчера ја прими Македонската кикбокс репрезентација, составена од македонските репрезентативци, претседателката на федерацијата Александра Неделковска, селекторот Дејан Митровски и тренерот на репрезентацијата Драган Атанасовски.
Македонската репрезентација имаше успешен настап на дваесетото Светско првенство за сениори што се одржа во Белград од 24 октомври до 1 ноември годинава.
Македонските кикбоксери Ненад Манојловски, Димитар Ѓорѓиев и Стефани Тодорова, постигнаа извонредни резултати во категоријата кик-лајт, освојувајќи два златни и еден бронзен медал во конкуренција на 669 натпреварувачи од 52 земји. Репрезентативецот Ненад Манојловски на Светското првенство во Белград ја доби и наградата за „најдобар борец“ на татами, а Димитар Ѓорѓиев трет пат по ред е светски шампион во својата категорија.
Градоначалникот им го честиташе огромниот успех и им пожела и во иднина да ги продолжат одличните настапи и да освојуваат уште многу златни медали.
