Свеченото затворање на „Скопско лето“ 2018 ќе се одржи вечерва со концерт на Камерниот оркестар на музичка младина на Македонија „Саша Николовски – Ѓумар“ со диригент Олег Кондратенко, кој ќе биде со почеток во 20:30 часот на Факултетот за ликовни уметности – Сули ан. Концертот е во соработка со Музичка младина на Македонија.

Камерниот оркестар на музичката младина на Македонија постои повеќе од 30 години и е основан како прв сегмент на Летниот музички камп на МММ во Охрид 1986 година.Овој ансамбл е прв и единствен од ваков вид на просторите на југоисточна Европа. Тој е составен од студенти на Факултетот за музичка уметност во Скопје, односно со учество на над 290 млади музичари, но и гости и млади музичари од други земји. Со своето музицирање во сиот овој период се наметна на музичката јавност не само како неопходност туку и како изведувачки состав со високо професионални квалитети.

Диригенти и уметнички раководители на оркестарот биле: Ф.Муратовски, Г.Коруновски, С.Николовски –Ѓумар, В.Николовски – Ѓумар, М.Спасов, Б.Цанев, А.Ремерајт, Б.Чадловска, О.Кондратенко, Е.Перцан со постојана тендеција за промоција на млади диригенти и солисти. Оркестарот има реализирано повеќе од стотина концерти, добивајќи високо позитивни критики, но и национални награди и признанија.

Покрај класичниот репертоар, оркестарот има изведувано дела од современи, како и од македонски автори. Како признание за постигнатите резултати во 1995 година оркестарот беше поканет и одржа концерт во Будимпешта по повод 50-годишнината од основањето на Светската федерација на музичка младина и приемот на Музичката младина на Македонија во оваа организација. Оркестарот има остварено повеќе телевизиски и радиоснимки, како и сопствена ЦД-продукција. Повеќе од 30 години завршниот концерт на Летната сесија на оркестарот е постојан дел на програмата на фестивалот „Охридско лето“, а во последните 10 години и на манифестациите „Скопско лето“ и „Битолско лето“.