Градоначалничката на Општина Кисела Вода, Бети Стаменкоска Трајкоска информираше дека денеска извршила увид во градежните активности за изградба на две нови сообраќајници во населбата Расадник - „Новопланирана улица-2“ и „Пристапна улица-2“.
„Ова е дел од нашата стратешка определба во Општина Кисела Вода за континуирано унапредување на патната мрежа, поквалитетно сообраќајно поврзување и повисок стандард на живеење“, истакна градоначалничката во објавата на Фејсбук.
Посочи дека роектот опфаќа: поставување на двослоен асфалтен коловоз на површина од 1.600 квадратни метри, со нови рабници од двете страни. Исто така рече дека предвидено било и поплочување на 460 квадратни метри нови тротоарски површини за поголема безбедност на пешаците, како и трајно и ефикасно справување со атмосферските води преку постоечките, но и изведба на нови попивателни сливници кои ќе го штитат коловозот при обилни врнежи.
„Со овие нови 1.600 квадрати асфалтно поврзување создаваме модерна и безбедна инфраструктура. Со правилно решавање на атмосферските води и квалитетно изведени коловози, директно влијаеме на подигнување на квалитетот на живеење и обезбедуваме побрза комуникација за сите наши сограѓани“, нагласи Стаменкоска Трајкоска.
