Центарот за управување со кризи информираше дека вчера попладне бил спасен повреден планинар над кичевското село Лавчани, на местото Два Камења. Како што посочуваат од ЦУК, вчера попладне имало координирана спасувачка акција на институциите и службите од Системот за управување со кризи и локално население за спасување и извлекување повреден планинар на непристапен терен.
„Преку бројот за итни случаи 112 во ЦУК вчера, во 14:12 часот, била добиена пријава за повреден планинар со скршеници на ногата, од локација над село Лавчани, поточно на местото Два Камења во Општина Кичево, по што координирата акција почнала. Лицето се наоѓало на непристапен терен. Поради непристапноста на теренот и неможноста за пристап за моторно возило, повреденото лице било преземено и пренесено од локалното население со коњ до селото Лавчани, каде итната медицинска помош и ПС Кичево го преземале повреденото лице и потоа го пренеле до Специјализираната болница за ортопедија и трауматологија „Св.Еразмо“ во Охрид“, се вели во соопштението.
