На Зимските олимписки игри Милано – Кортина 2026, кои се одржуваат од 6 до 22 февруари, ќе учествуваат околу 2.900 спортисти од 92 држави.
Photo by Maddie Meyer/Getty Images
Додека најголемите спортски сили настапуваат со бројни делегации составени од десетици, па и стотици натпреварувачи, значителен број земји ќе бидат претставени со мали тимови. Македонија е една од тие држави, но годинашниот настап има посебно значење, бидејќи за прв пат во историјата на македонскиот зимски спорт на Олимпијада ќе настапат четворица спортисти, сите со остварена А-норма.
Македонскиот олимписки комитет пред неколку дена на прес-конференција официјално го претстави олимпискиот тим што ќе ги брани боите на државата во Италија. Настапот во Милано – Кортина 2026 е осмо учество на Македонија на Зимски олимписки игри, по првиот настап во Нагано во 1998 година, но истовремено и најбројна македонска делегација досега. За разлика од претходните олимписки циклуси, кога Македонија настапуваше со еден или двајца натпреварувачи, овојпат бројката е зголемена, што претставува значаен чекор напред во контекст на зимските спортови.
Македонскиот тим е составен од четворица врвни спортисти кои се докажани во своите дисциплини. Во алпско скијање ќе настапат Јана Атанасовска и Виктор Петков. Атанасовска, која е најмлада членка на тимот и рекордерка во алпско скијање, ќе се натпреварува во слалом и велеслалом, додека Петков ќе настапи во истите дисциплини. Во нордиските скијачки дисциплини Македонија ќе ја претставуваат Ставре Јада и Ана Цветановска. Јада, како најискусен член на тимот, за кого ова се трети Зимски олимписки игри, ќе настапи во спринт и во трката на 10 километри со интервал старт, додека Цветановска, по настапот во Пекинг, повторно ќе се натпреварува во истите нордиски дисциплини.
Претседателот на Македонскиот олимписки комитет, Даниел Димевски, на прес-конференцијата истакна дека овој настап е резултат на континуирана работа и подобрување на олимпискиот систем. Тој нагласи дека за прв пат Македонија настапува со четворица спортисти со исполнета А-норма, оценувајќи го тоа како значаен успех за Скијачката федерација и за олимписката структура во целина. Димевски посочи и дека дополнителна вредност за тимот претставуваат новите партнерства и спонзори, меѓу кои обезбедувањето комплетна зимска опрема од брендот JOMA, како и медицинската поддршка од болницата Вита-Ес, што, според него, ја потврдува зголемената доверба во македонскиот олимписки тим.
Настапите на македонските спортисти се распоредени во неколку натпреварувачки денови. Нордиските дисциплини, во кои ќе настапат Јада и Цветановска, се закажани за 10, 12 и 13 февруари, додека алпските дисциплини, со настапи на Атанасовска и Петков, ќе се одржат на 14, 15 и 18 февруари. Со тоа, македонските спортисти ќе имаат можност во повеќе денови да ја претстават државата на најголемата светска сцена за зимски спортови.
Свеченото отворање на 25. Зимски олимписки игри се одржа истовремено на четири локации – Милано, Кортина, Предацо и Ливињо, што е еден од специфичните организациски концепти на овие Игри. Македонската делегација беше распоредена на три од овие локации. Јана Атанасовска го носеше македонското знаме во Кортина, Ставре Јада беше знаменосец во Предацо, каде заедно со него дефилираше и Ана Цветановска, додека Виктор Петков ја претставуваше Македонија во Ливињо.
Иако Македонија и натаму останува меѓу земјите со најмали олимписки тимови, настапот во Милано – Кортина 2026 ја отсликува постепената промена во пристапот кон зимските спортови. Во глобален контекст, Олимписките игри и понатаму ја покажуваат разликата меѓу државите со развиени спортски системи и оние со ограничени ресурси, но зголемениот број македонски спортисти на овие Игри претставува показател за потенцијалот што постои, како и за потребата од долгорочна и системска поддршка за негов понатамошен развој.
