Во Скопје има плева од билборди. Станува збор за околу 1.000 локации кои се доделени на долг период на концесионерите. Како што вели градоначалникот на Град Скопје, Петре Шилегов, оваа состојба е наследена и веќе се разговара со концесионерите за намалување на бројот на билбордите бидејќи ја загрозуваат безбедноста на граѓаните.

– Локациите за поставување на билборди се определени во постапка пред околу четири-пет години. Се работи за концесиски договор во времетраење од над 15 години, а еден е веќе предмет на кривична анализа. За мој вкус имаме премногу билборди во нашиот град и премногу издадени концесии од претходната администрација, вклучително и концесијата во Јавното сообраќајно претпријатие дадена на десет години и тоа на пет дена пред заминувањето на претходната администрација – рече Шилегов.

Кривичната анализа е поради недозволен пренос на добиена концесија за поставување билборди од една на друга фирма.

– Злоупотребата најверојатно се случила со потпишување акт или договор од претходниот градоначалник – информираат од Град Скопје.

Компанијата Медијас ДООЕЛ ги пренела правата на ЛИД Медија во трипартитен договор со Град Скопје, а концесијата била на 15 години.