Во тетовската полиција вчера бил пријавен вознемирувачки случај каде наводно мајка физички нападнала дете на возраст од околу три до четири години, а потоа го оставила на улица и си заминала.
Како што информира СВР Тетово, вчера во 17 часот било пријавено дека околу 14:15 часот на улицата „Маршал Тито“ жена го тепала своето малолетно дете.
Според пријавата, случајни минувачи реагирале и застанале да го заштитат детето, по што мајката го оставила на улица и заминала со количка во која се наоѓало друго малолетно дете.
За случајот биле известени јавен обвинител и Центарот за социјални работи во Тетово, а надлежните институции преземаат мерки за пронаоѓање на жената, утврдување на нејзиниот идентитет и целосно расчистување на настанот.
Детето, по укажаната лекарска помош, било предадено на грижата на Центарот за социјални работи Тетово.
