Поранешниот градоначалник на Скопје, Петре Шилегов, беше исклучен од СДСМ поради сериозни внатрепартиски несогласувања и јавни критики упатени кон раководството на партијата. Одлуката дојде по период на зголемени тензии меѓу Шилегов и дел од партискиот врв.
Извршниот одбор на СДСМ вчера донесе одлука и иницираше постапка за исклучување на Шилегов од членството на СДСМ, соопштија од партијата.
„Шилегов е уценет и одработува за ВМРО. Ја разоткривме целата бизнис шема на Христијан Мицкоски во енергетиката, од Адамовиќ до „Руднап“. Сега на сите им е јасно зошто толку многу сакаат да го рушат СДСМ. ВМРО толку падна што единствената опција им остана обидот да го урне СДСМ одвнатре“, велат од опозициската партија.
Сега, потенцираат од СДСМ, на сите им е јасно дека станува збор за „платформа за рушење на СДСМ“.
Од СДСМ реагираа дека неговите јавни настапи ѝ нанесуваат штета на партијата и придонесуваат за внатрешни поделби. Според партиските претставници, ваквото однесување е спротивно на статутот и принципите на организацијата.
