Пожар избувнал денеска претпладне во населбата Трајаново Трло во Кочани, откако била запалена мини депонија со кабли за различна намена, кај локацијата позната како Дивите градби – месност викана Антена.
Огнот неконтролирано и брзо се проширил до првите куќи во населбата на едната страна и на другата страна до самиот двор на ТППЕ.
Горела сува трева и нискостеблеста шума.
На терен веднаш интервенираа екипи на ТППЕ и ДПД Кочани, со неколку возила и десетина пожарникари.
Според информацијата за МИА од Драган Апостолов, командир на кочанската ТППЕ, состојбата била ставена под контрола, а огнот бил изгаснат.
Случајот ќе биде пријавен во ОВР Кочани и кај инспектор по пожари за да се утврди како дошло до избувнување на огнот и што го предизвикало.
