Се повеќе мажи завршуваат на Токсикологија поради мешање на солна киселина и варакина додека чистеле по дома

Секој ден по едно лице завршува на Токсикологија поради мешање на солна киселина и варакина додека чистеле по дома. Од клиниката алармираат дека бројот на вакви пациенти кои вдишале отровни гасови последната година драстично се зголемил.

-Речиси стана секојдневие, нема дежурство а да не дојдат 1-2 домаќинки или домаќини како резултат на вдишување на пареи од корозивни средства. Најчесто во домаќинството се користат солна киселина и варакина и нашите домаќинки мислат дека ќе постигнат поголем ефект ако ги помешаат овие 2 супстанци. За жал при ова се формира хемиска реакција при што се ослободуваат страшно иритативни дури и отровни гасови кои предизвикуваат проблеми, изјави д-р Нико Беќаровски, директор на Клиниката за токсикологија.

Вдишувањето на опсната хемиска реакција според токсиколозите предизвикува компликации на целиот респираторен систем, а посебно на белите дробови. Ако порано помош од лекарите поради нарушено здравје од корозивните средства за чистење барале само жени, сега тоа го прават и се повеќе мажи.

-Возраста е различна и во последните години нема само жени како што беше порано карактеристично, се повеќе и мажи завршуваат после чистење на санитарии, итн…додаде д-р Беќаровски.

Но, не само со компликации од вдишување, годишно на токсикологија завршуваат и стотина пациенти кои со намера да се отрујат испиле солна киселина или друго средство за чистење.