Реновирано детското игралиште „Млечен“ - Лукровски најави реконструкција на уште четири други

Градоначалникот на Општина Карпош, Сотир Лукровски денеска информираше дека уредувањето и ревитализацијата на детските катчиња низ Општина Карпош продолжува.

Тој посочи дека на детското игралиште „Млечен“ завршило реновирањето на урбаните реквизити, со замена на седиштата на лулашките и клацкалките.

Во рамки на петтата фаза од реконструкцијата, Лукровски во наредниот период најави дека ќе бидат опфатени и детските игралишта:

•  во населбата Жданец;
•  на улица „Букурешка“ во Тафталиџе 1;
•  помеѓу зградите на булевар „Партизански одреди“ бр. 197 и 109, во Тафталиџе 1;
•  помеѓу улица „Соле Стојчев“ и „Желево“ во Карпош 4.

Градоначалникот додаде дека на игралиштето во Карпош 4 ќе биде поставен и нов елемент со две лулашки со метална конструкција, а ќе се изврши и репарирање на постоечкиот реквизит – скалата.

„Создаваме побезбедни, поуредни и повесели места за игра и дружење на најмладите“, порача Лукровски.