Жители на скопската населба Карпош преку социјалните мрежи изразуваат незадоволство поради новите висококатници во делот околу Клиниката „Жан Митрев“ и трговскиот центар „Сити Мол“, тврдејќи дека објектите го нарушуваат природното струење на воздухот и создаваат дополнителни проблеми во урбаната средина.
Во објава што брзо се прошири на платформата X (поранешен Твитер), еден од корисниците наведува дека жителите на Карпош 1 и 2 во летните горештини добивале освежување преку воздушниот коридор од Шар Планина, но дека „џиновското бетонско чудо“ во близина на клиниката сега го запира тој провев.
жителите на карпош 1 и 2 на летните жеги добиваа малку свежина низ воздушниот коридор од шар планина. џиновското бетонско чудо на фатмир етеми (до жан митрев клиниката) сега го запира тој провев. да, мафијата овде има своја држава. се' е нејзино.
— Bisera (@zamislena) February 16, 2026
Друг корисник дополнува дека покрај проблемот со струењето на воздухот, станува збор и за зона во близина на хелиодром, каде, како што наведува, маневрите стануваат потешки, „каде што секундите се важни“.
Слични реакции има и од жители на Карпош 3, кои посочуваат дека „истото се случи и на улицата ‘Карпошево востание’“. Според нив, зградите кај „Сити Мол“ и клиниката создале блокада на струењето на воздух во правец исток–запад, при што улицата останала без провев, а споредните улици, изложени на исто сонце, се чувствуваат и до пет степени поладни.
Реакциите повторно ја отвораат темата за урбанистичкото планирање, висината и густината на градбите, како и за влијанието на новите објекти врз микроклимата и безбедноста во урбаните зони. Засега нема официјален став од надлежните институции во врска со овие наводи, но дискусијата на социјалните мрежи покажува дека дел од граѓаните сметаат оти прашањето заслужува поширока јавна дебата.
