Градските власти го купиле дрвото гинко кое треба да се засади на местото од каде што беше отстранет споменикот на Андон Јанев-Ќосето, пишува Независен.
Дрвото ќе биде засадено на 5 мај кога се очекува Град Скопје да го посети делегација од збратимениот Нирнберг.
Купени се три дрва, а 50 се во процедура за набавка.
- „Сѐ е подготвено, само се чека делегацијата од Нирнберг која ќе ја донесе плочката, која всушност ќе биде нивна донација и ќе стои на дрвото“, велат од Град Скопје, пренесе Независен.
За потсетување, на плочката ќе биде испишан текстот од членот 10 од Декларацијата за човекови права на Обединетите нации кој гласи: „Секој има целосно еднакво право на праведно и јавно судење пред независен и непристрасен суд, при одредувањето на неговите права и обврски и во услови на какво и да е кривично обвинение против него“.
