Под мотото „Кочани ви благодари“, во Кочани вчера се одржа пригоден настан на кој беа доделени признанија на сите институции, медицински тимови и поединци кои несебично помогнаа во спасувањето и лекувањето на повредените во пожарот во дискотеката „Пулс“.
Настанот беше обоен со силни емоции и потсетување на моментите кои го обединија градот и регионот во хуманоста.
- Пожарот во „Пулс“ не беше само трагедија. Тој беше судир со најтешките човечки страдања. Во тие часови на ужас, нашите деца, нашите млади, се најдоа лице в лице со огнот и чадот. А со нив – лице в лице со страдањето – се најдоа и оние кои се заколнале дека ќе го чуваат животот: лекарите, медицинските сестри, техничарите, болничарите, хуманите луѓе, рече градоначалникот Владко Грозданов во обраќањето пред многубројните гости и делегации на настанот.
Во Македонија, во соседството и низ Европа – многумина ја презедоа оваа битка како своја, поддржуваа, донираа – голем е бројот на тие што помогнаа, а нивните имиња никогаш не ќе ги дознаеме...
Кочани им благодари од сѐ срце – на тие што пристигнаа овде да го споделат овој чин на сеќавање и надеж и на тие на коишто признанијата дополнително ќе стигнат на нивна адреса! - беше порачанот на настанот.
Врвните уметници Симон Трпчески, Игор Дурловски, Зарина Првасевда, Јована Зајкова, Бобан Русески и Наталија Теодосиева придонесоа Кочани да изрази признателност, сочувство, поддршка, надеж – една година по трагичниот пожар во „Пулс“.
