Полицијата ја расветли кражбата на пари за исплата на пензиите на пробиштипските пензионери, што се случи на 1 октомври. Портпаролот на СВР-Штип, Гордана Панајотова вели дека уапсени се19-годишниот А.Д. и 22-годишниот Д.А.
А.Д е поштарот кој што тој ден имал задача да ги достави пензиите на пензионерите, а во неговата торба носел 360.821 денари.
– На први октомври во полициската станица во Пробиштип, А.Д., вработен во АД „Пошта на Северна Македонија” лажно пријавил дека во близина на „Аква парк” во Пробиштип, непознат сторител го нападнал и му одзел 360.821 денари, наменети за исплата на пензии. По преземени мерки и судска наредба, на 3 октомври полициски службеници од СВР Штип извршиле претрес на три локации во Пробиштип, при што биле пронајдени парите, како и наркотична дрога – амфетамин – вели Панајотова.
Во врска со лажната кражба, на службен разговор бил повикан и Б.З.(26) од Пробиштип.
Панајотова додава дека по целосно документирање на случајот, против лицата ќе биде поднесена соодветна кривична пријава.
