Метео прогнозерот Славчо Попоски во неговиот денешен „Метео аларм“ најавува дека претстојното лето ќе биде значително потопло.
Тој прогнозира дека температурите ќе бидат за околу 2 степени повисоки од повеќегодишниот просек.
„Ова лето ќе бидеме сведоци на чести и екстремно топли бранови од Африка кои ќе условуваат да имаме екстремно високи температури на воздухот кои во најголем дел ќе надминуваат 35 степени, а во Повардарието, Скопската котлина и во југоисточните предели почесто температурите ќе надминуваат и 40 степени, особено во јули и во август 2026. Често ќе ги имаме и оние тропски ноќи кои особено во Повардарието, Скопската котлината и во југоисточните предели од Македонија кога температурите ниту во текот на ноќните и утринските часови нема да се спуштаат под 20 степени“, се вели во метео алармот на Попоски.
Сепак, тој посочи дека и покрај ваквите температури, ќе има повремени освежувања на времето, со појава на поројни врнежи од дожд, силни грмежи и засилен ветер.
