„Полска низ фотографии – пред очите на македонската јавност“ е насловот на изложбата што ќе биде отворена вечер во Домот за култура „Кочо Рацин“ (Дом на градежници) во Скопје.
Изложбата е резултат на соработката меѓу корисничките групи „Викимедија Полска“ и „Споделено знаење“ од Македонија, во чест на одбележување на јубилејот на 100-годишнината од возобновувањето на независноста и државноста на Полска.
Претставени ќе бидат 20 слики од природата и од историски градби и знаменитости во Полска кои се дел од полското заштитено природно и култрно наследство, а се дело на корисниците на Викимедија и Википедија на полски јазик, од кои поголемиот дел учествувале како најдоброоценувани фотографии на фотографските натпревари „Вики ја сака земјата“ и „Вики ги сака спомениците“.
На отворањето ќе се обрати амбасадорот на Република Полска во Република Македонија Војчех Тичињски.
