Полицијата фаќа возачи кои веќе имат забрана за управување со возило

Тетовските полицајци бележат многу примери на возачи кај кои се констатирале сообраќајни прекршоци, а веќе имале забрана за управување со возило поради санкција за претходно прекршување на законските одредби.

Во многуте редовни и акциски контроли се наоѓаат возачи кои веќе се соочуваат со судска забрана да не управуваат возило од три месеци до една година зависно од прекршокот.

Во текот на август на поширокото тетовско подрачје откриени и законски санкционирани биле вкупно 107 лица без возачки дозволи, седум со несоодветна категорија, 11 со важечка забрана за управување и 26 возачи-почетници кои не се придржувале на предвидените ограничувања за оваа категорија возачи, информираат од СВР Тетово.

– Секторот за внатрешни работи Тетово и овој месец засилено го контролира управувањето без возачки дозволи и повторно апелира, посебно до младите, задолжително да посетуваат возачка обука и навреме да го положат соодветниот испит, теоретски и практичен, за да се стекнат со право да поседуваат адекватна дозвола, вели портпаролот Марјан Јосифоски.

Непоседувањето на дозвола се санкционира со изготвување поднесоци и со парична глоба од 250 евра во денарска противвредност. Толку изнесува глобата и за сопствениците на возилата кои им ги дале да ги управуваат на други лица, иако знаеле дека немаат возачка дозвола. Истото се однесува и на мотоцикли и земјоделска механизација, трактори, комбајни и друго.