Општина Карпош презема интервентни мерки за справување со загадувањето во општината, вклучувајќи и субвенционирање на заштитни маски за целни групи на граѓани. Според градоначалникот Стефан Богоев, на вонредната седница на Советот идната недела ќе предложи да се донесе ваква одлука.
Тој најави дека ќе почне процедура за итна набавка на прочистувачи на воздух за сите градинки и училишта, запирање на градежните активности кога загадувањето е најголемо, тековно одржување на улиците, тротоарите и слични градежни зафати кои ги реализира Општината.
Богоев најави дека ќе продолжат и редовните контроли, инспекции на градилиштата со цел да се спречи узурпирање на јавните површини и предизвикување на дополнителна нечистотија и загадување. Тој ги повика сите инвеститори, фирми, претпријатија на општествена одговорност да донираат прочистувачи на воздух и заштитни маски за граѓаните или, пак, да донираат финансиски средства на наменската сметка на Општината која е објавена на веб-страницата и на Фејсбук профилот на Општина Карпош.
Граѓаните, пак, ги повика активно да пријавуваат загадувачи на отворената телефонска линија.
Заедно со Град Скопје и Министерството за животна средина и Државниот инспекторат за животна средина продолжуваат заеднички и координирано да бараат трајни решенија за решавање на проблемот со загадувањето.
