Советниците од општина Карпош денеска, ја одржаа последната работна седница за време на четиригодишниот мандат на градоначалникот Стефан Богоев.
Членовите на Советот, меѓу останатите точки на дневен ред, ги разгледуваа и двете точки од областа на урбанизмот, поточно, двата детални урбанистички планови за Градска четврт ССЗ 02, Блок 06 и планот за Блок 9 од Градска четврт ССИ 03.
Првиот ДУП се однесува на потегот околу маркетот Хубо и болницата Систина, на вкупно 35,07 хектари. Речиси на 20% од вкупната површина која ја опфаќа оваа планската документација, ќе доминира зеленилото.
Појдовна точка во изнаоѓање на концепцијата на решението на овој ДУП, покрај насоките од ГУП-от на град Скопје 2012-2022 и Урбанистичкиот план за Четврт ССЗ 02, 2012-2022, се и создадените услови на просторот кој е предмет на изработка на оваа урбанистичка документација, велат од општина Карпош.
Површината на планскиот опфат е релативно градежно изградено земјиште, меѓутоа има појава на голем дел од неизградено земјиште кое треба плански да се уреди.
Со планот се формираат градежни парцели и се предвидуваат површини за градба со намена во согласност со ГУП на Град Скопје, Урбанистичкиот план за Четврт ССЗ 02, 2012-2022 и состојбата на терен.
Основа за изработка на вториот ДУП за Блок 9 од Градска четврт ССИ 03, општина Карпош и општина Чаир, ќе биде Стратегијата за одржлив развој (Агенда 21), важечката урбанистичка документација, ажурираната геодетска подлога, планската програма изработена одАгенцијата за планирање на просторот која е заверена во Министерство за транспорт и врски.
Овој ДУП (во рамки на границите на општина Карпош), се однесува на потегот околу касарната „Илинден“ и опфаќа површина од 18,89 хектари. Просторот ќе биде планиран со намена за објекти за домување во посебен режим, станбени објекти, трговски и хотелски единици, потоа, објекти за високо образование и наука, како и парковско и заштитно зеленило, информираат од локалната самоуправа на Карпош.