Градоначалникот на Општина Гази Баба, Бобан Стефковски денеска информираше дека Општината ќе обезбеди бесплатна екскурзија за учениците од социјален ризик.
„Секое дете заслужува безгрижно детство, можност да учи, да патува, да се дружи и да создава спомени кои ќе ги памети целиот живот. Финансиската состојба никогаш не смее да биде причина некое дете да биде изоставено. Токму затоа, Општина Гази Баба обезбедува бесплатна екскурзија за учениците од социјален ризик, затоа што веруваме дека сите деца заслужуваат еднакви можности, еднаква грижа и еднаква шанса да бидат дел од училишните активности“, истакна Стефковски во објавата на Фејсбук.
Тој посочи дека екскурзиите не се само патување, туку дека тие се нови пријателства, нови знаења, незаборавни моменти и искуства што остануваат засекогаш во сеќавањата на секое дете.
„ Продолжуваме да градиме општина во која социјалната грижа не е само ветување, туку секојдневна реалност. Ги поддржуваме семејствата на кои помошта им е најпотребна и вложуваме во иднината на нашите најмлади. Кога инвестираме во децата, инвестираме во иднината. Кога им даваме еднаква можност на сите, создаваме поправедно, похумано и посилно општество“, порача градоначалникот.
