Градоначалникот на Општина Центар, Горан Герасимовски денеска информираше дека била отстранета дивоградбата кај ресторанот „Мечка“.
„Општина Центар ја урна нелегалната доградба која подолго време го блокираше тротоарот и дел од коловозот во Дебар Маало. По повеќе опомени и непостапување, инспекциските служби и механизацијата излегоа на терен и ја отстранија бесправно поставената конструкција што го попречуваше нормалното движење на пешаците и сообраќајот“, вели Герасимовски во својата Фејсбук објава.
Тој додаде дека жителите на Дебар Маало ја поздравиле акцијата.
„Општината продолжува со засилени контроли и активности за расчистување на нелегално поставени објекти со цел воспоставување ред и заштита на јавниот интерес“, порача Герасимовски.
